Die Poolse boor polka

Hoe sê mens “hou op fokken boor!” in Pools? Ons bure (of iemand in die blok, ek sal beter voel as ek die bron kan identifiseer) is besig met ‘n bou en brekery. Ek weet dat hulle bou en breek omdat ek die konstante geluid van een of ander powertool kan hoor. Dit klink soos ‘n boor, maar ek mag verkeerd wees. Ek weet ook dat ek die 1-man werkspan in Pools moet aanspreek, aangesien ek die bouer/breker, kom ons noem hom Krzysztof (het Poolse name nie altyd baie z’s in nie?) op en af onder in die straat sien stap as dit sy smoke break is. Hy praat dan ook gewoonlik hard genoeg op sy foon dat sy stem 2 verdiepings optrek en deur double glazing vensters gehoor kan word. Hy praat Pools. Selfs al sou ek geen idee gehad het van hoe Pools klink nie sou ek geweet het om hom as Pools te identifiseer aangesien almal wat enige iets met hulle hande doen, (skrynwerkers, verwers, bouers, loodgieters), betroubaar is, en nie heeltemal so duur is soos hulle Sweedse ekwivalente nie, omdat die Sweedse “Skatteverket” (belastingowerheid) nie heeltemal van hulle bestaan weet nie, Pools is. In Stockholm het jy nie ‘n bediende nie, jy het ‘n Polish.

Die Swede is gewoonlik baie bedagsaam en los netjies getikte briefies vir hulle bure oor enige tipe aktiwiteit wat moontlik aandag sal trek. “Die water sal vandag van 07:00 – 07:15 af wees, ons is VREESLIK jammer”. “Ons hou ‘n partytjie vir ons ouma. Daar sal 3 mense wees. JAMMER vir die geraas!”. “My kind kry tande, JAMMER vir die gehuil” en so aan en so voorts. Daar is dan ook selfoon nommers sodat jy iemand kan uitkak as die JAMMER jou nie aanstaan nie. Hierdie mense wat nou breek en bou het nie ‘n nota gelos nie. Hulle het seker geweet Krzysztof gaan baie mense kwaad maak (lees Netjane) en hulle het nie tyd om telefoonoproepe van Suid-Afrikaners wat ‘n mengsel van Sweeds, Afrikaans en Engels praat omdat hulle so kwaad is, te antwoord nie.

Die probleem met die bou geluide is nie die geluide per se nie, ek het al genoeg DIY in my lewe gedoen om gewoond te wees aan alle tipe geluide, dis die ritme waarmee dit gedoen word wat my kwaad maak. Die boor (of watookal dit eintlik is) begin so opwarmings “jiiiiiinnnnnn” en dan stop dit. Dan sit mens mos nou daar en wag dat die ding weer moet begin. Dan begin dit weer “jiiiiiiin, krrrrrr” en dan stop dit. Eers hier by die derde probeerslag is dit ‘n vol siklus van “jiiin-krrr-ghhghghghgrrrr”. Vir ‘n sekonde, of minder. (Miskien boor hy baie vreeslike klein gaatjies?) Net om weer oor te begin! Ek wil net hê hy moet jinn-krr-ghhghghghgrrr vir ‘n uur en dan klaar wees, nie hierdie stop-start-stop-start ritme wat nou plaasvind nie. Dit is nou die tweede dag van ek en die Poolse boor polka. Gister was ek vir meeste van die tyd uit, in die reën, sneeu en wind, wat beteken het ek was nog meer kwaai toe ek gistermiddag by die huis kom en vir Krzysztof buite in die straat sien rook. Ek het hom aangegluur, maar ek dink my gluur sou meer effektief gewees het as ek “hou op fokken boor!” in Pools kon byvoeg.

Advertisements

8 thoughts on “Die Poolse boor polka

  1. mykopop Maart 18, 2008 / 11:15 vm

    he he he, of as jy nou net vir hom mooi kon verduidelik wat hy met sy boor kan doen!

  2. netjane Maart 18, 2008 / 11:24 vm

    Jy’s reg Mykop . “Druk jou boor in jou gat” kan mos iets heel anders ook beteken? 😉

  3. René Maart 18, 2008 / 11:34 vm

    Jane, sê dit vir hom in suiwer boere Afrikaans! Hy sal weet jy vloek hom!!! 😆

  4. pik234kelik Maart 18, 2008 / 2:26 nm

    Die woordeboek sê: Stop: Stoppa/stunna/sluta/blandare/paus/hejda
    Boor: drilla, borra, exercera. Maar ek dink nie dit gaan jou veel help nie, want nerens kry ek ‘n vertaling vir fok nie. Strongs. As dit te erg raak kry jou eie boor, een van daai koordloses en hou hom aan as gyselaar….

  5. boendoe Maart 19, 2008 / 6:38 vm

    Hiehie, ek stem saam met Rene. Vloek hom in goeie Afrikaans. Dis wat ek doen as my Portugees my in die steek laat. Jou stemtoon en gesig sal wel die boodskap oordra!

  6. Da Mario Maart 20, 2008 / 5:28 nm

    Ek verneem by Babelfish:
    Остановите fucking сверлить
    Nou as jy dit kan lees…. 😆

  7. netjane Maart 20, 2008 / 5:32 nm

    Hulle boor nogsteeds! En dis half ses op die aand voor Goeie Vrydag! Suid-Afrikaanse bouers was al lankal long gone! Laat ek net bysê hulle het vanoggend 7 uur begin, so ek het glad nie goed wakker geword nie!

Lewer kommentaar

Verskaf jou besonderhede hieronder of klik op 'n logo om in te teken:

WordPress.com Logo

Jy lewer kommentaar met jou rekening by WordPress.com. Log Out / Verander )

Twitter picture

Jy lewer kommentaar met jou rekening by Twitter. Log Out / Verander )

Facebook photo

Jy lewer kommentaar met jou rekening by Facebook. Log Out / Verander )

Google+ photo

Jy lewer kommentaar met jou rekening by Google+. Log Out / Verander )

Connecting to %s